تجربة الشهر الأول ..!

من مدة طويلة وأنا أود الإشتراك بـ نادي تكون فترة التمرين فيه قصيرة وفوايده عالية شي شبيه بـ T25 وغيره .

طبعاً غالبية الأشخاص اللي حولي واللي مسجلين في بعض النوادي الرياضية يقضي ساعتين أو أكثر في النادي !

وبصراحة كثييير خاصة مع مشاغل الحياة وزحمة الرياض "هههه" يومك نصه رايح والواحد وده يسوي اكثر من شغلة بيوم واحد وتقضي يومك بشكل كويس ..

طبعا كأي جلسة شباب جالسين نسولف كالعادة عن النوادي الرياضية ولخبطة الاكل وكيف كل واحد جايب العيد في وجباته وكيف ممكن يعدلها ووووو.. ؟ وجاء على الطاري ٩ راوند !؟ وانه ما ياخذ منك وقت طويل بحدود ٣٠ -٤٥ دقيقة ومن هالأمور

المهم اني تحمست للفكرة على أساس إني بأسجل وما حصلت لي في الفترة التي ما قبل رمضان ..!

كذلك فيه كذا شخص من اللي حولي تحمسوا وسجلوا وما شاء الله تبارك الله النتائج حلوة وكويسة .. ؟! طيب ليش ما أسجل !؟

سجلت في النادي من شهر تقريباً "الحمدلله" و توي طالع من ٩ راوند هههههه وانا جالس أكتب التدوينة , الثوت , سميها زي ما انتا عاوز .. هههههه

قبل ما أبدأ بالتجربة ودي اذكر نظامي السابق والملخبط مع الرياضة والعادات بالعموم .. 😅 ثم بعدها بأبدا بالشي اللي صار في الشهر الماضي

كـ عادات رياضية كان النظام كالتالي :

  • احاول إني أمارس الرياضة “ركض او لعب كورة” ٣-٤ مرات بالأسبوع قدر المستطاع ! (غالبا ألتزم فيها أسبوعين الى شهر ويخرب النظام شهرين هههه)

  • أحاول قدر المستطاع إني أستخدم الدرج بدل المصاعد “فقط للصعود” أما بالنسبة للنزول فأستخدام المصعد أسلم وأفضل لسلامة الركبة . “مستمر عليها والحمدلله"

  • التسخين ما قبل التمرين ضروري جدا جدا جدا ! ٢٥ دقيقة ممتازه جدا.

  • مدة الركض كانت بحدود ٣٠ - ٤٥ دقيقة ولازم أنهي فيها ٥ كيلو أو أكثر ..! (طبعا مثل ما ذكرت إني أستمر لفترة وأقطع لفترات)

النتائج :

  • في البداية كانت شي رهيب جداً لكن بعد مرور فترة من الإستمرار على هذا النظام جاني الطفش حقيقة !

  • بعدها التغيير صار ضعيف جداً جداً ولازم أزيد المدة وهذا الشي اللي ما أبي أسويه "ذكرت السبب في البداية" لأن ودي أنجز أو أؤدي كثير في يومي بوقت قصير .. من بعدها بدأ التفكير بـ ٩ رواند.. !

*التجربة : * رهيبة جداً جداً .. والسبب أن التمارين تكون جاهز لك وما تفكر وش برنامج اليوم مجرد ما إنك تجهز نفسك وتحط أغراضك في الخزنة وتسخن بشكل بسيط من ٣ - ٩ دقائق ومن بعدها تبدا الجولات .. طيب وش فكرة الجولات ..؟


٩ رواند

فكرته :

  • ببساطة يكون فيه ٩ جولات تبدأ فيها التمارين وكل تمرين يكون تدريجي بأنه يرفع مستوى النشاط أو اللياقة عندك بشكل أعلى وأعلى .

  • سبب اهتمامي واختياري للنادي هو المدة اللي جالس اقضيها فيه وغالبا تكون من ٣٢ - ٤٧ دقيقة بالضبط ! وهذا شي جيد والتأخير عادة يكون من الوقت اللي جالس أكون فيه بالنادي يكون مزحوم وما فيه الا لاين واحد للجولات وموب الكل يقبل إن أي أحد يشاركه في جولته بسبب رغبته في التركيز على الجولة نفسها.

  • بين كل جولة وجولة يكون فيه ١٥- ٣٠ ث تقريباً يكون فيها تمرين يركز على عضلة معينة وتكون من المدرب المتواجد بحيث كل الأشخاص اللي أنهوا جولاتهم يتوقفون ويبدأون التمرين مع المدرب في فترة الانتقال ما بين الجولتين ..!

  • التمارين اللي تكون بين الجولات مثل ما ذكرت سابقاً تكون مدتها قصيرة ودائما تكون تمارين ارضية . تمارين بطن او تمارين بوش اب او غيرها من هذه التمارين.

  • التمارين متنوعة لكن غالباً فيه تمارين ثابتة في الجولة الاولى وغالبا يكون قفز الحبل او شي مشابه له و freestyle والمقصود فيه ضرب كيس البوكسينق سواء بالرجل أو الكوع أو لكمة مباشرة بأي طريقة كانت .

النتائج :

  • رائعة على المستوى الشخصي وعلى الجسم بحكم تركيز التمارين على كامل الجسم على مدار الأسبوع وتكون على كامل العضلات سواء عضلات الأرجل أو عضلات الجزء العلوي من الجسم.

  • مافيه تغير من ناحية الوزن بشكل كبير وذلك بسبب إني ما وزنت الكتلة العضلية والدهون قبل الدخول في البرنامج ! “للأسف :”(“

  • تحسن في النوم وزيادة في ساعات النوم العميييق “شيء رائع جداً جداً جداً” . رغم عدم ترتيب ساعات نومي “للأسف :”(“

نصائح :

  • إختيار الوقت المناسب للذهاب للتمرين مهم جداً ويحفظ وقتك .

  • لا تأكل وتروح النادي بتروح غلطة هههههه

  • إعتني بوجباتك من حيث الترتيب حتى ما تتعب .

  • لا تكون شارب قهوة أو شاهي أحمر\أخضر قبل التمرين لأن الوضع بيكون قمة في العطش ههههه .

  • حاول تضبط ربطة اليد قبل تبدأ التمرين حتى ما يصاب مفصل يدك من الضرب على الكيس وطبعاً ربطة اليد هذه لحالها قصة كل يوم أربطها بشكل إلى أن تعلمتها بشكل صحيح .. “يوجد في النادي من يساعدك وهناك شاشات في غرفة تغيير الملابس للي وده يتعلم (شي جميل جداً)”

فيه مصايب ثانية صارت معي بس ما اذكرها حاليا صراحة

وش الشي اللي كان يحمسني :

  • صغار وكبار السن اللي يحضرون يومياً .. و أتكلم عن أعمار المتواجدين ١٥ - ٥٠ تقريبا "العمر تقريبي من راسي" ويكملون الجولات بشكل كامل "ماشاء الله عليهم".

  • لما تخلص جولة معينة وتناظر الأرض وتصير معبية عرق ههههههه

  • لما يجي الشخص المسؤول عن التنظيف ويجلس عندك وينظف كل شوي علشان ما تزلق وأنت تتمرن "شعور بطططل..!"

أتوقع هذه أبرزها .. ولو جاء في بالي شي بأقوله ..

--

هناك بعض الأمور اللي كنت اراعيها أو وقعت فيها خلال فترة الشهر وهي كالتالي :

  • الإهتمام بالوجبات خاصة وجبة الفطور شي مهم وضروري جداً !!!

  • لا تشرب قهوة كثير في يومك والسبب إنها بتمسك السوائل “لا أحسن التفسير العلمي لهالشي”.

  • زيد من شرب الموية وكل ما تشوف علبة مويه خذها واشرب سواء في السيارة او على المكتب وكل مكان.

  • تجنب الشرب أثناء الأكل حاول يكون بعد الوجبة بـ ٣٠ دقيقة “نصيحة وصلتني ولاحظت الفرق فيها”.

  • تناول المكسرات ولازم لازم تكون غير مملحة وغير محمصة “الكاجو والجوز”.


برامج وأدوات واجهزة كنت أستخدمها :

  • shine from Misfit : كنت أستخدمها لمتابعة الاكتفيتي اللي أسويها بشكل يومي على مستوى النادي وغيره
  • Misfit Application : التطبيق كان يفيدني كثيراً في تحديد القراءات والإنجازات اللي كنت أسويها من نوم و أكتفيتي بشكل عام
  • iPhone 6 : جهاز اللآيفون مالنا غناة عنه هههه و أستخدمه في المزامنة وربطه مع الـHealth kit

هذا اللي أذكره حاليا صراحة بشكل كامل في تفاصيل لو حبيتوا اذكرها ممكن أكتبها .. وبس ,